انا ومنى و"وندى" واه منك يا ندى

عنوان غريب وى انا عارفه بس فيه حاجه حصلتلى من يومين وعشان انا قررت انى احكى كل حاجه بتحصلي وحشه كانت او حلوة الا ان الموقف استوقفنى جدااااا وهقولكم السبب
انا اعز اصحابي "منى"حبيبتى واختى وصاحبتى هيه متجوزة ومخلفه بيبي زي العسل اسمها "ندى"وحطو الف خط على ندى دي
المهم من كام يوم اتصلت بيها لان منى دي من اكتر الناس اللى برتاح في الكلام معاهم لانها فاهمانى اوى اوى وعارفانى اوى وهيه اللى بتحس بيا وبتقولى على احساسي اللى جوايا من غير انا ما اقوله
المهم المكالمه كالاتى
انا: ازيك يا منى وحشتني اةى
منى:وانتى كمان يا ندله بجد واحشانى
انا:انا برضه اللى ندله مانا بتصل بيكي اهو
منى:انا عارفه بس انتى عارفه من يوم ما ندى جت وانا والله مش عارفه اعمل اى حاجه منها
انا:ولا يهمك يا مونى...بقولك ايه انا نفسي اشوفك جدا جدا
منى:وانا كمان واللهي يا مها
انا: خلاص مش محمد قايلك مادام ندى كبرت ممكن تاخديها وتخرجى معايا عادى
منى: اه طبعا
انا: خلاص يا منى اتحلت تعالى بدل قاعده البيت ننزل نخرج مع بعض
منى: خلاص اوك شوفي اى يوم ننزل فيه نروح نقعد في اى جنينه
!!!!!!!!!!!!!
انا: !!!!!!!!!جنينه
منى: قالتلى اه طبعا اما انتى فاكره ايه هوه انا هعرف اقعد معاكى في مكان وكافي وكده والهانم دي معايا...استحاله طبعا لانها ممكن تفضحنى
انا: هوه الزمن جرى بينا للدرجه دى...هوه احنا كبرنا اوى كده
منى: يا مها خلاص انا بقيت ام ومعنتش بفكر زي زمان فيه اولويات تانيه
انا: يا منى انتى فكرتينى بامى وخالاتى
منى:الزمان جرى يا مها اوى اوى اوى انا نفسي مش مصدقه انى بقيت ام انا ساعات بقعد ابص لندى واقولها انتى جيتي امتى واخدتى حياتى منى ازاى
شفتو بقى
ده اللى انا بكلم فيه...الزمن جرى اوى اوى اوى بيا...مش حاسه بيه
دي منى اللى كنا بننزل يحصلنا كل موقف ولتانى ونقعد نضحك عليه بسبب الهبل اللى احنا فيه
وصلنا للدرجه الامهات والخاله والبت والعيال كده يا ندى تاخدى منى اختى منى؟؟
ياااااااااااه
كده برضه يا زمن