Sunday, March 7, 2010

المزارعات الفاتنات

ياااااااااه بقالي كتير اوى مجيتش هنا والله وحشتنى اوى اوى المدونه دي
انا جايه احكي على حاجه بصراحه عجبتنى اوى وهي "المزارعات الفاتنات"طبعا محدش فاهم حاجه
عملت اكونت عادي جدا على الفيس زي اى مواطن بشري في المصر واللى اصبح ظاهره بس بصراحه انا حبيته اوى لانه بيقرب الناس من بعضها اوى الناس ممكن تستخدمه في حاجات كويسه وممكن حاجات مش كويسه
المهم فيه لعبه هاتجننى لحد دلوقتى وهي
farmville
والفيس بوكيين المأصلين طبعا عارفينها المهم اللعبه بقيت بتعمل مفاجات وبتخلى الناس تتشارك مع بعضها عشان نعدي اللعبه دي واصبحت هوس لاغلب البنات
واحده عملت جروب وسميته المزارعات الفاتنات وجمعت اكتر ناس بتلعب ومهتمه بالعبه دي وبدل ما بقينا بنتشارك بس عشان نلعب بقينا بنتعرف على بعض وبقينا اصحاب واصبح لينا شات كمان بنطمن فيه على بعض
ممكن حد يقول ايه الهيافه دي
بس انا بالنسبه لى مش هيافه لانى بحب اكون صداقات وبحب الناس اوى واتاملت كده ان حاجه بسيطه اوى مجرد لعبه على الفيس تجمع بنات من مختلف المحافظات ومختلف الاعمار وبقوا فعلا صحاب
انا بحب الفاتنات اوى وبحب اللعبه اوى اللى قربتنا اوى ومش عارفه لما اللعبه دي نخلص هنعمل ايه
بس الجديد بقى انى لاقيت اغلبهن من المدونات...الله على كده يعنى هانتشارك كمان في المدونه
الله الله

Tuesday, December 15, 2009

سنه جديده سعيده عليكوووو

اااااااااااااه بقالي كتير اوى مدخلتش هنا انا بدات ادون من سنه 2006 تقريبا وحصلتلى ظروف كتيره اوى صعبه وشيلتها خالص بس الحمدلله
-----------------------------------------------
بعد اما فوقت رجعتها تانى ولكن بعد ما خسرت ناس كتيرة اوى اوى كانوا عارفنى المهم سنه جديده سعيده عليكو ويارب كل واحده يقعد مع نفسه كده ويعمل زي حصاد 2009 وعمل فيها ايه حلو وعمل فيها ايه وحش
وياترى كل واحد ب
قى نفسه في ايه السنه الجديده 2010؟
وايه احلى حاجه حصلت لكل واحد فيكم في 2009؟
وايه اوحش حاجه حصلت؟
----------------------------------------------
وانا هابتدى انا احلى حاجه حصلت ليا في 2009 انى اتخطبت للانسان اللى الحمدلله كنت بتمناه
وانى صاحبت ناس كتيره اوى الحمدلله طلعوا كويسين
واوحش حاجه انى اتنيلت واشتغلت في البتاع اللى بشتغل فيه ده ...يلا نصيب بقى
وانى برضه عرفت ناس كتيرة طلعوا زفت
اللى بتمناه ان فرحتى تكمل بخطيبي وجوازى ...يااااااااربوانى الاقي شغل احسن وان احوالى تتصلح واشوف كل اللى بحبهم بخير
----------------------------------------------
يلا يا اصحابي عاوزين نتشارك باحلامنا وزكرياتنا مع بعض ونقرب من بعض اكتر واكتر

Sunday, November 8, 2009


اصعب حاجه لما تحس انك فرحان اوى....وخايف اوى من الفرحه وعلى الفرحه دي
اصعب حاجه لما تحس ان ربنا اداك احلى حاجه في دنيتك....وفي نفس الوقت تخاف منها او تخاف عليها اوى
اصعب حاجه لما تحس ان فيه قدامك ظلم ومش عارف ترده....وتخاف على نفسك لا تتظلم من نفس الشخص
اصعب حاجه انك تحس ان اقرب الناس ليك مش واقف جنبك
اصعب حاجه لما تحس بالخوف من حاجه متعرفهاش
او من بكره....بالذات من بكره
مشاعر كتيرة اوى جوايا من حب اوى اوى ومن اطمئنان اوى اوى
ومن خوف اوى اوى
ومن خنقه اوى اوى اوى
ومن ظلم اوى اوى اوى

Saturday, October 17, 2009

يارب تممها بخير يا رب

خطوبتى يوم الخميس معرفش حاسه بإيه
والله ما اعرف فرحانه
خايفه
مش عارفه
بس احساس غريب
ا
لمهم عاوزة دعواتكم ليا
انه يتمها لى بخير ....والتفاصيل بقى يوم الجمعه لان هايبقى عندى موقعه اسمها المشاوير والفساتين واللذي منه
والبنات بقى عارفه
وعقبالكم كلكم

Saturday, September 26, 2009

ادعولى





مش هقول غير كلمتين
حيرانه اوى اوى
ادعولى بجد ان ربنا يقدملى كل الخير

Saturday, September 5, 2009

رمضانيات وكل سنه وانتو طيبين

كل سنه وانتم طيبين تانى وقربنا اهو على ليله القدر ويارب دعواتنا كلها تكون مستجابه اما عن رمضان وتليفزيون رمضان واعلانات رمضان ....واه من اعلانات رمضان والى لفت نظري في اعلانات رمضان (غير انها طويله وبايخه)3 حاجات

اولا: جريده روزاليوسف جريده بلون حياه كل المصريين
ده على اساس ان حياه المصريين بيضا

ثانيا: السكك الحديديه اللى بيطوروها كتر خيرهم في العربيات بتاعت القطارات(تو ما افتكروا يعنى)وشوف عندك بقى
ابوس رجليكو يا مصريين يا معفنين احنا نضفناكو وجددنا لكم القطر انضفوا بقى وبلاش توسخو

ثالثا:مستشفى سرطان الاطفال
هم الساده الاعلاميين بتوع الاعلانات والفنانين بيفتكروهم في رمضان بس
على اساس ان المستشفى بتفتح في رمضان او بتبدا في استقبال المرضى في رمضان بس

وربنا يجعل بيت المحسنين عمار ويجعله عامر مع الاعتذار للاستاذ احمد رجب