سنه جديده سعيده عليكوووو

اااااااااااااه بقالي كتير اوى مدخلتش هنا انا بدات ادون من سنه 2006 تقريبا وحصلتلى ظروف كتيره اوى صعبه وشيلتها خالص بس الحمدلله

-----------------------------------------------
بعد اما فوقت رجعتها تانى ولكن بعد ما خسرت ناس كتيرة اوى اوى كانوا عارفنى المهم سنه جديده سعيده عليكو ويارب كل واحده يقعد مع نفسه كده ويعمل زي حصاد 2009 وعمل فيها ايه حلو وعمل فيها ايه وحش
وياترى كل واحد بقى نفسه في ايه السنه الجديده 2010؟
وايه احلى حاجه حصلت لكل واحد فيكم في 2009؟
وايه اوحش حاجه حصلت؟
----------------------------------------------
وانا هابتدى انا احلى حاجه حصلت ليا في 2009 انى اتخطبت للانسان اللى الحمدلله كنت بتمناه
وانى صاحبت ناس كتيره اوى الحمدلله طلعوا كويسين
واوحش حاجه انى اتنيلت واشتغلت في البتاع اللى بشتغل فيه ده ...يلا نصيب بقى
وانى برضه عرفت ناس كتيرة طلعوا زفت
اللى بتمناه ان فرحتى تكمل بخطيبي وجوازى ...يااااااااربوانى الاقي شغل احسن وان احوالى تتصلح واشوف كل اللى بحبهم بخير
----------------------------------------------
يلا يا اصحابي عاوزين نتشارك باحلامنا وزكرياتنا مع بعض ونقرب من بعض اكتر واكتر

اصعب حاجه لما تحس انك فرحان اوى....وخايف اوى من الفرحه وعلى الفرحه دي
اصعب حاجه لما تحس ان ربنا اداك احلى حاجه في دنيتك....وفي نفس الوقت تخاف منها او تخاف عليها اوى
اصعب حاجه لما تحس ان فيه قدامك ظلم ومش عارف ترده....وتخاف على نفسك لا تتظلم من نفس الشخص
اصعب حاجه انك تحس ان اقرب الناس ليك مش واقف جنبك
اصعب حاجه لما تحس بالخوف من حاجه متعرفهاش
او من بكره....بالذات من بكره
مشاعر كتيرة اوى جوايا من حب اوى اوى ومن اطمئنان اوى اوى
ومن خوف اوى اوى
ومن خنقه اوى اوى اوى
ومن ظلم اوى اوى اوى

يارب تممها بخير يا رب

خطوبتى يوم الخميس معرفش حاسه بإيه
والله ما اعرف فرحانه
خايفه
مش عارفه
بس احساس غريب
المهم عاوزة دعواتكم ليا
انه يتمها لى بخير ....والتفاصيل بقى يوم الجمعه لان هايبقى عندى موقعه اسمها المشاوير والفساتين واللذي منه
والبنات بقى عارفه
وعقبالكم كلكم

كل لبيب بالاشاره يفهم

ادعولى

مش هقول غير كلمتين
حيرانه اوى اوى
ادعولى بجد ان ربنا يقدملى كل الخير

رمضانيات وكل سنه وانتو طيبين

كل سنه وانتم طيبين تانى وقربنا اهو على ليله القدر ويارب دعواتنا كلها تكون مستجابه اما عن رمضان وتليفزيون رمضان واعلانات رمضان ....واه من اعلانات رمضان والى لفت نظري في اعلانات رمضان (غير انها طويله وبايخه)3 حاجات

اولا: جريده روزاليوسف جريده بلون حياه كل المصريين
ده على اساس ان حياه المصريين بيضا

ثانيا: السكك الحديديه اللى بيطوروها كتر خيرهم في العربيات بتاعت القطارات(تو ما افتكروا يعنى)وشوف عندك بقى
ابوس رجليكو يا مصريين يا معفنين احنا نضفناكو وجددنا لكم القطر انضفوا بقى وبلاش توسخو

ثالثا:مستشفى سرطان الاطفال
هم الساده الاعلاميين بتوع الاعلانات والفنانين بيفتكروهم في رمضان بس
على اساس ان المستشفى بتفتح في رمضان او بتبدا في استقبال المرضى في رمضان بس

وربنا يجعل بيت المحسنين عمار ويجعله عامر مع الاعتذار للاستاذ احمد رجب

رمضان كريم عليكو

كل سنه اونتو طيبين ورمضان كريم علينا كلنا ويارب نكون رمضان ده اقرب لربنا اكتر واكتر واللى كان نفسه يدعى ربنا بحاجه يدعى وربنا ان شاء الله يستجيب واللى كان نفسه امنيه تتحقق في رمضان يارب تتحقق
ويارب يتغفر لنا ذنوبنا كلنا ويجعل ايامنا كلها رمضان ويبعد عننا استفذاذات الشوارع والتليفزيون امين
اما عنى بقى ف انا نفسي في فااااااااااااااااااااانوس
بس مش اى فانوس
ولا بيصفر ولا بيزمر ولا بيغنى ولا بيشتغل بالبطاريه ولا على شكل كرومبو ولا ماركته صيني
انا عاوزاه مصري...مصري اوى اوى
زي اللى فوق ده له طعم وشكل وفرحه تانيه خاااااااااااالص
بس هلاقيه فين ده بس؟